ಹೆಣ್ಣು

*ಹೆಣ್ಣು*

ಏನೇನೋ ಆಗಬೇಕಿದ್ದ
ಅತಿರೇಖ ಕನಸುಗಳನ್ನು ಕಂಡ
ಅಂತಹ ಸಾಮರ್ಥ್ಯವನ್ನು ಹೊಂದಿದ್ದ
ಹೆಣ್ಣು ಮಕ್ಕಳು
ರೇಷ್ಟೆ ಸೀರೆಯುಟ್ಟು
ತಾಳಿ ಬಿಗಿಸಿಕೊಂಡದ್ದೆ ತಡ
ಹಡೆದರು ಹಸುಗೂಸುಗಳನ್ನು
ಆಶ್ಚರ್ಯವಾಗುವಂತೆ
ಅವರು ಮಕ್ಕಳನ್ನು ಮಾತ್ರ ಹೆರಲು ಹುಟ್ಟಿರುವಂತೆ..

ಕರಕುಶಲ ಕಲೆ
ನೃತ್ಯ, ಅಭಿನಯ, ಭಾಷಣದಂತಹ ಅಭಿವ್ಯಕ್ತ ಸಂಗತಿಗಳಲ್ಲಿ ನಿಪುಣರಾಗಿದ್ದ ಅವರು
ಹೊಟ್ಟೆ ಮುಂದೆ ಮಾಡಿಕೊಂಡು, ಮುದ್ದಾದ ಹಸುಗೂಸಿನೊಂದಿಗೆ ಎದುರಾಗಿಬಿಟ್ಟರೆ
ಹಾರಿ ಹೋಗಲಿದೆ ನಮ್ಮ ಪ್ರಾಣ..

ಬರವಣಿಗೆಯೆಲ್ಲ ಬಹುದೂರ ಸಾಗಿ
ಕನಸುಗಳೆಲ್ಲ ಕಣ್ಮುಚ್ಚಿಕೊಂಡು
ಗುರಿಗಳೆಲ್ಲ ಗೋರಿ ಕಟ್ಟಿಸಿಕೊಂಡು
ಸಾಂಬರಿಗೆ ಸರಿಯಾಗಿ ಉಪ್ಪು ಹಾಕಿ
ಬಿಸಿನೀರು ಕಾಯಿಸುತ್ತಾ
ಒಬ್ಬಳೇ ಬಸ್ಸಿನಲ್ಲಿ ಓಡಾಡುವಂತಾಗಿಬಿಟ್ಟರೆ!!

ಆ ಚಿಗುರನ್ನು ಚಿವುಟಿದವರ್ಯಾರು?
ಆ ಕನಸನ್ನು ಕಸಿದುಕೊಂಡವರ್ಯಾರು?
ಆ ಬೆಳಕನ್ನು ಬಸಿದುಕೊಂಡವರ್ಯಾರು?
ಬದುಕೆಂದರೆ ಇನ್ನೂ ಬದುಕಿದೆ ಅಂದುಕೊಳ್ಳೋದ?
ಬದುಕುವವರೆಗೆ ಬದುಕಿದರಾಯ್ತು ಅಂದುಕೊಳ್ಳೋದ?

ನಾಲ್ಕು ಗೋಡೆಯ ಮಧ್ಯೆ
ಮೌನಿಯಾಗುವಳೆ ಹುಡುಗಿ
ಬಯಕೆಗಳೆಲ್ಲ ಸೊರಗಿ
ಸೆರಗಿನಲ್ಲಂಟಿರಬಹುದೆ ಹುದುಗಿ..

- ಚಂದ್ರು ಎಂ ಹುಣಸೂರು